24 Saat Bəs Etmir? Şagirdlər Üçün Real Zaman İdarəetməsi

Bəzi şagirdlərə baxırsan: riyaziyyat olimpiadasına gedir, eyni zamanda veb-sayt yığır və üstəlik hər həftəsonu dostları ilə futbol oynamağa da vaxt tapır. Sən isə sadəcə ev tapşırıqlarını bitirmək üçün gecə yarısına qədər oyaq qalırsan. Sirr nədir? Onların günü 26 saat deyil, sadəcə olaraq enerjilərini hara və necə xərclədiklərini bilirlər.

Ən böyük yalan "multitasking" (eyni anda bir neçə iş görmək) yalanıdır. Musiqi dinləyərək, Instagram-a baxaraq və fizika məsələsi həll edərək sən əslində heç birini tam etmirsən. Beyin diqqətini hər dəfə birindən digərinə keçirəndə böyük enerji itirir. Buna görə də sənə lazım olan yeganə şey "bloklaşdırılmış vaxt" (time blocking) texnikasıdır.

Gününü sadəcə bloklara böl. "Saat 16:00-dan 17:30-a qədər yalnız kod yazacam, telefon otaqda olmayacaq." Bu 90 dəqiqəlik dərin fokus sənə o qədər məhsuldarlıq verəcək ki, başqa vaxt o işi 4 saata çətin bitirərdin. İşin bitdi? İndi tamamilə rahatla. Gedib dincəl, oyun oyna. Çünki yarımçıq işləmək qədər, yarımçıq dincəlmək də səni məhv edir.

İkinci qayda isə "Yox" deməyi öyrənməkdir. Sənin hədəfin Taskool-da bir texnoloji layihəni bitirməkdirsə, sənə heç bir xeyri olmayan əlavə bir tədbirə sadəcə "ayıb olmasın" deyə qatılmaq məcburiyyətində deyilsən. Zaman sənin ən dəyərli valyutandır, onu başqalarının mənasız gözləntilərinə xərcləmə. Öz prioritetlərini təyin et və o yolda diqqətini dağıdacaq hər şeyə qapını bağla.